Hripui vei enkawl lai an pung leh hret

November 3, Ningani khan Mizoramah Covid-19 vei mi 16 hmuh chhuah a ni. Nimin khan hripui vei dam tawh mi pali chhuahtir an ni a, nimin tlai khan hripui vei enkawl mek mi 40 an awm a, an pung leh hret.

IDSP aṭanga thu dawn danin, Ningania Covid-19 positive hmuh chhuahte chu Aizawl leh Mamit district-ah mi panga ve ve, Lunglei district-ah mi pathum, Serchhip district-ah mi pahnih leh Champhai district-ah mi pakhat an ni a; sawb sample 130 endik aṭanga positivity rate chu 12.31% a tling.

Mizoramah swab sample 19,88,930 endik tawh niin, Covid-19 vei 2,38,840 hmuh chhuah a ni tawh a, a pumpuia positivity rate 12.01% a ni. Nimin tlai dar 3 thlengin mi 2,38,074 (99.68%) chhuahtir an ni tawh a, mi 726 (0.30%) thi tawhin, enkawl mek mi 40 (0.02%) an awm.

Nimin tlai dinhmun angin, Mizorama district 11 zinga district pali - Siaha, Kolasib, Lawngtlai leh Hnahthial district-ahte Covid-19 vei an awm tawh rih lo a ni.