Ei-in tur enfiahna tlangzarh

Ei leh in tur enfiahna, mobile food testing laboratory thar chu nimin khan Health & Family Welfare minister Dr R Lalthangliana'n mipui hman theih turin New Capital Complex-ah a tlangzarh.

Health Minister chuan, mipui tana ei leh in him leh ṭha hralha pek chhuah a nih theih nan endik hmasak a pawimawh tih sawiin, "Hmun kilkhâwr zawk pawh thleng thei, kawng dunga thingpui dawr leh hotel-a ei tur siamte a him tawk em tih enfiah zung zung theihna tur mobile food testing laboratory hman theih a ni ta hi a lawmawm hle a ni," a ti.

Ei leh ina fimkhur a ṭul thu sawiin R Lalthangliana chuan, "Tui tak leh hrisel tak nia lang, mihring nunna atana pawi thei a awm ṭhin," a ti a; ei turte a thianghlimin a hrisel tâwk em tih uluk taka enfiah tura hmun hrang hranga kal kual thei Mizoram sorkarin a nei ta chu ṭangkai taka hman a nih a beisei thu a sawi.

Sorkar thuchhuah tarlan danin, mobile food testing laboratory hi famkim thei ang bera thuam a ni a, food product chikim endik theih ni lo mah se, ni tina ei leh in mamawh zualpui endik thei tura ruahman a ni. Guidelines-in a sawi angin, technical officer, analyst, attendant leh driver-ten an enkawl dawn a ni.