KHAWTHLIR

Sunday School Ni
Naktuk Pathianni hi Khawvel Sunday School Ni a ni a, sunday school hrang hrangah hman a ni dawn. Mizoram Presbyterian Kohhran chuan puitlingah 'Rilru put hmang siamṭhat' tih an zir dawn a, intermediate leh senior department-in 'Rilru hrisel' tih an zir ang a, beginner-junior department-in 'Mephibosetha' an zir ang. Khawvel Sunday School Ni hi November thlaa Pathianni hmasa berah hman ṭhin a ni.

MP Rosanga tel
November 3, Ningani khan New Delhi-ah Parliamentary Standing Committee on Health and Family Welfare an ṭhukhawm a, Lok Sabha MP C Lalrosanga a tel. C Lalrosanga chuan, hmarchhak bialah ruihhlo vanga rilru lama harsatna nei tam tak an awm thu sawiin, chu'ng mite chuan mithiam leh enkawlna ṭha an mamawh thu a sawi a ni.

Unit tlawh chhuak
Congress paty hruaitute chuan MPCC Campaign Committee ruahmannain kumin October 29 aṭanga November 3 thleng khan Aizawla Congress unit-te tlawh chhuahna hun an hmang. Intlawh chhuah hunah hian Congress party MLA-te leh hruaitu hrang hrangte an thawk chhuak a, hruaitute'n thu an sawi zawhah zawhna leh chhanna hun hman ṭhin tih MPCC thuchhuah chuan a tarlang.

MZP-in phût
MZP Gen. Hqrs chuan thuchhuah siamin, tun hnaia Mizoram Public Service Commission leh Mizoram Subordinate Services Selection Board-in sorkar hna thawk tur an lakah hnam dang hming a lang zauh zauh chu pawi an tih thu an tarlang a; "Mizorama hna thawk tur hrang hrang lakah ram leilung fa zingah tling leh tlak an awm chuan duhsak hmasa ngei turin thuneitute kan phût a ni," an ti.

HIV/AIDS sawiho
Mamit District AIDS Prevention Control Committee chuan nimin khan DC conference hall-ah district bawrhsap Lalnunhlua kaihhruaiin HIV/AIDS sensitization programme an buatsaih. Mamit district-ah HIV/AIDS vei 2.37% an awm a, anti retroviral therapy la mi 11,630 an awm mek tih tarlan a ni. Zoram Harh Rawh programme hnuaia intihsiakna turah tel turin YMA branch paruk an inhriattir tawh tih tarlan a ni bawk.