Vairengtea kawng dan tihtawp a ni ; CYMA hruaitute'n palai hna an thawk

Land Owners' Association (Vairengte-Kawnpui Package 3-6 NH 06 & 306) chuan, zangna­dawmna pek an phût avanga November 3, 2022 zing aṭanga Vairengte dáia national highway kawngpui an dan chu November 5, Inrinni tlai khan an titàwp. Kawngpui dan tihtawp a nih theih nan Central YMA hruaitute chu Inrinni khan Vairengteah kalin an palai a ni.

NH kawngpui zauhna atana an ram lâkah zangnadawmna pe thuai tura Mizoram sorkar karna atan ram neitute chuan November 3, 2022 zing dar 6 aṭangin Vairengte dáiah kawngpui an dang a ni. Ni thum chhung an danna ní, Inrinni khan CYMA hruaitute chuan an president R Lalngheta hoin kawng danna hmun an tlawh a, Land Owners' Association hruaitute an kâwm a; CYMA ngenna avangin November 5, Inrinni tlai dar 4:30 vel khan kawngpui dan chu an titawp ta a ni.

R Lalngheta chuan, ram neitute thil phût chu tihhlawhtlin dan a awm leh awm loh chief minister Zoramthanga an sawipui thu a sawi a, "Hetianga kawng dan reng hi ṭha kan tih loh avangin kan thiam leh phâk ang tâwkin hma kan la ve a ni," a ti.

CYMA President chuan, kawngpui dan tihtawp a nih theihna atana hma la tura Chief Minister an ngen thu sawiin, Chief Minister ngenna angin palai hna an thawk tih ram neitute a hrilh.

Land Owners' Association hruaitute leh CYMA hruaitute chu hun eng emaw chen an inkawm hnuah kawngpui dan chu Inrinni tlai dar 4:30 velah tihtawp a ni a; CYMA hruaitute chuan ram neitute thil phût a hlawhtlin ngei theih nan theihtawp chhuaha hmalak zui zel an intiam a ni.

Land Owners' Association chuan, kawngpui dan tihtawp rih ni mah se, an beisei anga sorkar hmalakna an hmuh loh chuan an kal dan tur an rèl leh dawn thu leh, November 2022 chhung sorkar hmalakna an ngaihchân leh phawt dawn thu an sawi.