Kolasib-ah NE NSS Festival nghah a ni

India hmarchhak state pariata National Service Scheme (NSS) volunteer-te intawhkhawmna, North East NSS Festival 2022 chu Kolasib-ah ṭan a ni a, November 5, Inrinni khan Sports & Youth Services minister Robert Romawia Royte-in a hmanpui.

November 4, 2022-a ṭan NE NSS Festival 2022-ah hian Inrinni khan Kolasib College-ah inkhawm buatsaih a ni a, Mizoram University-a NSS programme coordinator Dr Benjamin L Saitluanga'n kaihruaiin, SYS Minister-in thu a sawi a; hnam làm leh zaite entir a ni.

Minister Robert Romawia chuan, Covid-19 hripui vanga hun engemaw chen NE NSS Festival buatsaih theih a nih loh hnuah Kolasib district-a a vawi khatna atan hman a ni chu lawmawm a tih thu a sawi a; state hrang hrang hnam ziaráng inzir tawnna leh ṭhian ṭha insiamna hun atana hmang turin NSS volunteer-te a chah.

Mizoramah NE NSS Festival ṭum li buatsaih a ni tawh a, kumina Festival hi November 4-8 chhunga neih tur a ni a, Mizoram bakah, Nagaland, Tripura, Assam, Sikkim, Manipur, Arunachal Pradesh leh Meghalaya aṭangin NSS volunteer 300 vel an tel.

State NSS officer Dr Zirlianngura tarlan danin, sorkar kum kal mekah April 2022 aṭanga November 5 thlengin Mizorama NSS-te'n thisen pek (blood donation camp) ṭum 67 an buatsaih tawh a, chuta ṭang chuan thisen unit 3,510 an pe tawh. Faina hnatlang leh thing phunte an buatsaih ṭhin bawk.

Inrinnia Kolasib College-a inkhawmah SYS minister Robert Romawia chuan, Mizorama NSS chu state chhunga páwl hrang hrang zinga thisen pe tam ber an ni chu fakawm a tih thu sawiin, Mizorama NSS hmalakna chu ram pum ang pawha chhuanawm tak a nih thu a sawi a; NSS thupui, mahni aia mi dangte dah hmasak chu a taka nunpui zel turin a fuih.

Robert Romawia Royte chuan, NSS volunteer kal khawmte chu social media hman dan chintâwk nei tur leh thil ṭangkai atan hmang ṭhin tura a fuih bakah, tum mumal tak nei tur leh an tum tihlawhtling turin tih tur leh ngaih pawimawh hmasak turte felfai taka thliar hmasa ṭhin turin a chah a; Mizoram páwn aṭanga telte chu an chhungte leh ṭhiante nen Mizorama zin leh ngei turin a sawm báwk.

NE NSS Festival chhung hian life skill, communication skill, mental health leh thil dangte an zirho dawn a; taksa insawizawina hun te, social work hun te, thiamthil pho chhuahna hun leh hnam làm leh zai entirna hunte an hmang bawk ang.