Hachhek bialin November 15 thleng Mizoram sorkar an ngaichâng dawn

Hachhek Bial Kuhva Chingtu Pawl (HBKCP), YMA Taitesena Group leh Langkaih Group hruaitute November 5, Inrinnia Kawrthah North VC House-a ṭhukhawm chuan, Hachhek bial chhunga kuhva rah hralh a nih dan tura sorkar hmalakna November 15, 2022 thleng an ngaichâng dawn. Hma la tura sorkar an phût avanga bandh an kalpui mek pawh an titawp rih.

Hachhek Bial Kuhva Chingtu Pawl, Hachhek bial chhunga village council-te leh páwl hrang hrangte chuan Hachhek biala kuhva rah tharte hralh a nih theihna atan hma la tura sorkar kar nan November 1, 2022 aṭangin an bial chhunga sorkar hnathawk pisa kái tur an dang a, ni li chhung an dang a ni.

Sorkar hnathawk dan an nih hnuah sorkar aṭanga thu lawmawm an hmuh loh avangin November 5, Inrinni khan Hachhek bial chhungah bandh an huaihawt a; darkar khat vel bandh an huaihawt hnuah HBKCP, Taitesena Group YMA leh Langkaih Group YMA hruaitute ṭhukhawm chuan sorkar hmalakna November 15, 2022 thleng ngaihchàn leh phawt an rél a ni.

HBKCP, YMA Taitesena Group leh Langkaih Group chuan thuchhuah inṭâwm siamin, "Kuhva hralhna tura sokar hmalak mekna ngaichângin, sorkar zahawm tak ngenna avangin bandh kal lai tihtàwp rih a ni. November 15, 2022 thleng sorkar lam thuchhuak ngaihchàn ni se, a ṭul anga ruahmanna siam leh tur a ni ang," an ti.

HBKCP leh YMA-te hian Myanmar kuhva ro tawlh ruk chu theihtawpa dan zel an rél a, sorkar phal loh kuhva phur lui lo turin lirthei neitute an ngen bawk.