KHAWTHLIR

Thisen pe
KṬP, Dinthar Branch chuan an branch din champha pualin November 5, Inrinni khan an kohhran hall-ah Synod Hospital tan thisen unit 39 an pe a, petute mipa 33 leh hmeichhia paruk an ni. PYD (NEI), Kolasib Venglai bial pawhin Social Work Day pualin Inrinni khan Kolasib District Hospital tan thisen unit 33 an pe a, petute mipa 22 leh hmeichhia 11 an ni.

Award dawng
Mission Foundation Movement chuan kut themthiamna leh kutkawih eizawnna lama an thawh ṭhat avangin November 4, 2022 khan UK Parliament-a House of Lord-ah award an dawng. Award hi House of Lord-a Democrats deputy leader Lord Navnit Dholakia leh Shadow minister (International Trade) Ruth Cadbury hnen aṭangin MFM executive director Lalramchuanzela'n a dawng. Programme hi WBR Corp, UK huaihawt a ni.

Mi pakhat thi leh
October 29, 2022 tlaia Tuirial Airfield Venga tuialhthei phurtu tank lorry kânga mihring kâng tel zinga mi, Lalawmpuia, Thingsul Tlangnuam chu nimin chawhnu dar 2 vel khan Zoram Medical College-ah a thi a; heti hian tank lorry kânga kâng hlum chu mi pasarih an ni ta a ni. Chhiatna thlen ní-ah mi pali an kâng hlum a, November 2 khan mi pahnih an thi belh hnuah, nimin khan mi pakhat a thi ve leh a ni.

Covid-19 vaccine
Mizoramah November 5, Inrinni thleng khan Covid-19 vaccine dose 17,71,977 pek a ni tawh. Vaccine pekte chu dose khatna 8,78,325, dose hnihna 7,49,012 leh booster (precaution) dose 1,44,640 a ni. Covid vaccine hi January 16, 2021-ah pek ṭan a ni.

DC-in khap
Khawzawl DC CC Lalchhuangkima chuan Mizoram pawn leh Mizoram district dang, infected area-a puan khua aṭanga vawk, vawksa leh vawksa aṭanga siam thil hrang hrangte lakluh bakah, vawk damlo talh leh hralhte a khap a; AH&Vety department-ah vawk talh turte hrisel dan leh mihring tana eitlak a nih leh nih lohte finfiah hmasak tur a ni. Vawk suat duh tan AH&Vety department-ah dilna thehluh tur a ni.

Pipe phúm dawn
Vawiin aṭangin SIPMIU-in Vaivakawn Traffic Point aṭanga Seventh Day Tlang panna péng inkarah tui pipe lian an phûm dawn a, hna thawh zawh a nih hma chu kawng chanve khâr a nih dawn thu leh hnathawh tibuai thei tura lirthei leh bungrua dah phal a nih loh thu Traffic SP Rodingliana Chawngthu chuan a tarlang. November 14-19 chhungin Mizoramin International Tourism Mart a thlen dawn avangin hna thawh a ni dawn lo thung.

AB-PMJAY helpdesk
BJP, Mizoram Pradesh chuan Prime Minister Ayushman Bharat Scheme (AB-PMJAY) chungchang hriat chian duh neite tana zawhfiah theihna turin vawiin aṭanga November 11, Zirtawpni thleng hian BJP office, Upper Republic-ah Helpdesk an siam dawn. MBJP chuan AB-PMJAY chungchang hre chiang duhte chu Helpdesk pan turin an chah a ni.