Crime & Economic Offences PS thar

Mizoram Police-a CID (Crime) hnuaia Crime & Economic Offences Police Station thar chu November 4, 2022 khan DGP Devesh Chandra Srivastava-a'n a hawng. PS thar hi CID (Crime) SP office, CID Complex, Bungkawnah dah a ni.

Crime & Economic Offences PS hawnna inkhawm hi MPSOA Conference Hall-ah buatsaih a ni a; DGP Devesh Chandra Srivastava chuan, Criminal Investigation department hna pawi-mawh tak tak Mizoram Police Manual 2005-a ziah tawh chu kum 17 hnuah a taka tihhlawhtlin a ni ta tih sawiin, lawmawm a tih thu a sawi.

Sorkarin economic offences lam vila chhui turin kum 2008 khan Wing hran a din a, DIG (CID) chu chairman niin, CID (Crime) SP chu nodal officer a ni a, SDPO/deputy SP 16 leh district hrang hranga police station 35-a OC-te chu investigation team an ni. Police station hranpa siam a ni lo thung.

Kum 2010-ah Economic Offences Wing (EOW) din a ni a; sum leh paia inbumna, FIU-IND suspicious transaction report, Mizoram Protection of Interests of Depositors Act 2002/2019 hnuaia thubuai te, non-banking financial company leh unincorporated body vil hnate an thawk a, sum tam tak tihchingpenna thubuai eng emaw zat an chhui tawh a ni.

Mizoram sorkar chuan Crime & Economic Offences Police Station hawng turin October 10, 2022 khan notification a chhuah a, November 4 khan hawn a ni ta a ni.