Hripui léng karah hmasawnna hna Kan kalpui zel dawn - Lalruatkima

Minister of state Lalruatkima, MNF party-a adviser chuan, Zoramthanga kaihhruai sorkarin Covid-19 hripui donaah leh hripui léng karah theihtawp chhuahin hmasawnna hna a kalpui zel dawn thu a sawi.

Lalruatkima hian July 27, Thawhṭanni zan khan Tuikual South-a MNF zawm thar lawm luhna inkhawmah thu sawiin, Mizoramin ei leh bara harsatna a tawh lohna turin sorkarin theih­tawp a chhuah zel thu a sawi a, "Hripui Covid-19 léng vanga harsatna kan tawh mekah pawh theihtawp chhuah­in hri léng darh lohna tur te, chhuanchham kan awm lohna turtea sorkar hmalakna rah chhuah kan hmu zel a ni," a ti.

"Tun thlenga chhuanchham kan awm lo hi chung lam malsawmna, kohhran, tlawmngai pawl hrang hrangte leh sorkar ṭanrualna vang a ni," tiin Lalruatkima chuan, MNF sorkar hmasaah mautàm ṭam karah harsatna lutuk tâwk loin sorkarin a hruai chhuak tawh niin a sawi.

Lalruatkima chuan, Congress sorkar laia zu zawrh vanga harsatna te, kawng chhia, gas harsa leh ei leh bara harsatnate sut­kianin a awm mek nia sawiin, "A thlàwna buhfai sem, ration chini sem, dailuah ration-a sem te, gas kan hnianghnar tate hian Pu Zoramthanga hruai sorkar hi mipui ta leh mipuite hamṭhatna ngaihtuahtu a nihzia a tilang chiang hle," a ti bawk.