Khawthlangtuipuia lei dawh tur enfiah

Border Security Force (BSF)-a Mizoram leh Cachar biala hotu ber inspector general Binay Kumar Jha chuan nimin khan Tlabung a tlawh a, India leh Bangladesh inrìna vela ram venhimna tihchakna tura Khawthlangtuipuia lei dawh kai dan tur a hmunah a enfiah.

BSF IG Binay Kumar Jha chuan, Khawthlangtuipuiah lei dawh a la nih loh avangin BSF-te'n kawng hrang hrangin harsatna an tâwk ṭhin tih a sawi a; lei dawh kái a nih chuan sipaite harsatna zualpui a chhâwk zângkhai dawn bakah, mipui pawhin an chhawr ṭangkai dawn thu a sawi bawk.

Central PWD hotute sawi danin, Khawthlangtuipuia lei dawh tur chu metre 204-a sei, metre 5.5-a zau a ni dawn a, lei dawh nan cheng nuai 5,040 ruahman niin, thil a kal tluan chuan kuminah hna ṭan hman beisei a ni.

BSF IG Binay Kumar Jha hi BSF 163 battalion commanding officer mawhphurhna latu Amar Singh Narwal, Central PWD hotute leh, National Projects Construction Corporation Limited (NPCC) hotute'n an ṭawiawm a; lei dawh hna tluang taka ṭan thuai a nih theihna tura hmalak dan tur an sawiho a ni.