Covid-19 positive an pung leh hret

Mizoramah Covid-19 vei November 4, Zirtawpni khan mi 25 leh November 5, Inrinni khan mi panga hmuh chhuah a ni a; hripui vei dam tawh Inrinni khan mi paruk leh nimin khan mi pali an chhuak. Covid-19 positive enkawl lai an pung leh hret.

November 4, 2022-a hripui vei hmuh chhuah mi 25-te chu Aizawl district-a mi 13, Lunglei leh Mamit district-a mi panga ve ve leh, Serchhip leh Lawngtlai district-a mi pakhat ve ve an ni a; swab sample 316 endik aṭanga positivity rate chu 7.91% a ni.

Inrinnia Covid-19 positive hmuh chhuah mi pangate chu Lunglei leh Serchhip district-a mi pahnih ve ve leh Mamit district-a mi pakhat an ni a; sample 58 endik aṭangin positivity rate 8.62% a ni.

Mizoramah swab sample 19,89,304 endik tawh niin, Covid-19 vei 2,38,870 hmuh chhuah a ni tawh a, a pumpuia positivity rate 12.01% a ni. Nimin tlai dar 3 thlengin mi 2,38,084 (99.67%) chhuahtir an ni tawh a, mi 726 (0.30%) thi tawhin, enkawl mek mi 60 (0.03%) an awm.

Nimin tlai dinhmun angin, Mizorama district 11 zinga district pali - Siaha, Kolasib, Khawzawl leh Hnahthial district-ahte Covid-19 vei an awm tawh rih lo.