Gas tihchingpen bûr 111 man
Legal Metrology enforcement staff-te chuan July 25, 2020 khan Seling Indane Gas Agency-a dah tur eirawngbawlna gas, truck pahnihin an phurh chu hlànthlak hmain endik a ni a, gas bûr khawih chingpen 111 hmu chhuakin an mansak.
Gas khawih chingpen leh bûk tling lo phurtu truck AS-24 C-6088, Suraj Pari s/o Lalcharam Pari, Cachar, Assam khalh aṭangin gas bûr 100 khawih chingpen a ni a; truck pakhat zawk AS-01 KC-5247, Minagul Haque s/o Aslam Uddin, Cachar, Assam khalh aṭangin bûr 11 khawih chingpen a ni thung.
Legal Metrology chuan, tunlai hian gas tihchingpen a hluar a, duty tur thawktu an indaih tâwk lo tih tarlangin, mipuite chu gas an lâk dawnin agency-te bûktir ngei turin an chah a; harsatna an neih chuan gas agency manager, local council, consumer union, FCSCA department, police, Legal Metrology-ahte hriattir theih a nih thu an tarlang.