CADC CEM atan Amit Kumar Chakma la lut

Chakma Autonomous District Council (CADC) chief executive member (CEM) atan Amit Kumar Chakma chu November 9, Ningani khan Art & Culture Hall-ah lak luh a ni a; Lawngtlai DC aiawhin CADC Court President & Recorder-in rinawmna thu a tiamtir.

Amit Kumar Chakma hi 9th. CADC-ah Reng­kashya MDC bial aṭanga thlan tlin niin, tun hi a ṭum khat MDC tlinna a ni. 9th. CADC-ah hian Dr BD Chakma, Buddhalila Chakma leh Kali Kumar Tongchangya te hnuah CEM palina a ni.

CADC-a Executive Committee-a member pariat awm zinga paliin bànna an theh luh hnua CADC chu rorel thei loa a awm tak avangin July 4, 2017 khan Governor’s rule hnuaiah dah a ni.

Governor thupeka July 2017-a floor test-ah CEM ni lai Kali Kumar Tongchangya chuan rin tâwk a hlawh zo lo a, Cong­ress Legislature Party hruaitu atan Amit Kumar Chakma chu thlan a ni.

Amit Kumar Chakma-a'n Governor hnena CEM atana ruat tura dilna a thlen chu CADC inrêlbawlna thila buaina hrang hrang awm avangin Governor chuan a tikhawtlai a; hei vang hian Amit Kumar Chakma chuan Gauhati High Court, Aizawl Bench-ah petition theh lutin, thla hnih hnuah Court chuan CEM atana ruat turin thutlukna a siam a ni.

November 3, 2017 khan Governor chuan CEM atana Amit Kumar Chakma ruat remtihna a ti chhuak a ni.