Pathianin a hman duh ringa pên chhuak an nih thu ZPM-in an puang

Ṭangrual pawl - Zoram peoples' Movement (ZPM) chuan nimin khan Kolasib Press Club-ah thuthar thehdarhtute an kâwm a; ZPM general secretary K Sapdanga chuan, ZPM chakna chu Pathian a nih thu sawiin, "Kan ram damna pawh Lalpa kutah a awm. Keini hi hnam damna hmanrua atan Pathianin min hmang duh mial ang tih ringin kan pên chhuak a ni," a ti.

K Sapdanga chuan, kum 15 vel kal ta aṭangin MLA inthlan apiangin mi tam takin phûr lo takin vote an thlak ṭhin a, mipuiin pawl pahnih an bûk ṭhinah thlan chak zawng an nei tawh meuh lo tih sawiin, "Kum 2018 inthlan aṭang chuan mi tinin phûr takin vote kan thlak tawh ang; a chhan chu, sorkar ṭhaa rualawtte'n beiseina thar kan neih tawh dawn vang a ni," a ti a; symbol pathum - kawng siam ṭha duh lo pawl pahnih leh kalphung thara mipui sorkar din tumtute an lan tur thu a sawi.

Rorel lai party-in 'Keini lo chu mipuiin tlanchhiatna dang an nei chuang lo, ministry kan term thum dawn,' an tih laiin, eptu pawl pakhat chuan 'Mizoramah term hnih bak sorkar ngai a ding thei lo,' an tih thu sawiin Sapdanga chuan, "August 15-a ṭangrual pawl a pian khan party liana inngaite nuih a zâ a. Thla a pumhlûm a, rin ai taka mipui khawngaih kan hlawh tak hnu hian, sawi nêp tumin ṭan an la leh hnuhnawh a ni," a ti.

ZPM Val Upa Council chungchangah K Sapdanga chuan, "VUC hi India danpui nena inhne rem tura siam a ni hran lo a, a inkalh hek lo. Eptu pawlte zawm atana siam pawh a ni lo. Ṭangrual pawl chhungkuaa siam rem ngai apiang siamremtu atana siam a ni," a ti a; VUC thutlukna chu ZPM-a telte'n an hnial dawn loh thu leh an rin tawk thu a sawi.

K Sapdanga chuan, ZPM hotute'n common programme an duang mek tih sawiin, "Common idea a awm sa a, thil thar danglam chiam a awm lo ang. Sum hmangin kawngpui kan siam dawn a, kawngpui hmangin sum siam kan tum ve lo. Hydel project tênau tê tê din vanga anticipatory bail lak sup sup hi kan hrethiam lo a, ṭul pawh kan ti lo. Ukil ruai kher loin kawlphetha Mizote hnianghnar tham siam kan tum," a ti.

ZPM hruaitute chuan, kawng siamna tur sum pawt pênga vote zawn nana sem chu Pathian remtih zawng a nih an rin loh thu sawiin, "Mamawh khawp doctor rawihna tur sum nei lo khawpa sem tur sum pawh khawm hi Mizote hriselnain a tuar a, hlamzuih a tipung a, cancer vei tam ber hnam, HIV+ve tam ber hnam kan nih phah a, siamtu duh dan a nih kan ring lo," an ti a; ZPM chuan sum sem an tum loh thu an sawi a ni.