KMMTTP-ah 68.55% zawh a ni tawh

October 10, 2010-a hna thawk ṭan, Kaladan Multi Modal Transit Transport Project (KMMTTP) hnuaia Lawngtlai aṭanga Myanmar ram pawh tur kawngpui sial mek chu 68.55% zawh a ni tawh.

NEDP hnuaia thuthar thehdarhtute'n Mizorama project kalpuite zir chianna tura ruahmanna siam hnuaiah KMMTTP kawng sial mek hi Ningani khan Lawngtlai District MJA-te'n an vice president Lalngheta Ralte hoin an tlawh a, Lawngtlai DIPRO C Lalhruaitluanga'n a hruai. MJA member-te hian kawng laih tura ruahman km. 87 zinga km. 82 thleng an tlawh a ni.

Contractor RDS camp-ah kawng viltu PWD hotute chuan kawngpui sial mek chungchang sawifiahin, hna pumpui aṭanga chhûtin 68.55% thawh zawh a nih tawh thu an sawi a, "Ruahtui a tlak rei avangin company-te'n duh angin hna an thawk sâwt lo deuh ṭhin. Mi ṭhenkhatin kawng bula thing kitin, an kawngpui siamsa a tih­chhiatsak ṭhin hi pawi hle a, FIR thehluh a ni tawh," an ti.

Kawngpui sialtu RDS Project Ltd. leh Atlanta ARSS (joint venture) hotute sawi danin, kawng sialnaah hian hmun eng emaw zatah lei nghet lo a awm a, leimin a nasat avangin hna thawh a sâwt loh bakah, ruahtui tam lutukin hmalakna a tiṭhuanawp deuh ṭhin.

Ministry of Road Transport & Highway kaltlanga Mizoram PWD-te vilna hnuaia kawngpui sial mek hi, a tira sum sên tura ruahman chu cheng vbc.677.20 a ni a, ṭum hnih ennawn tawh niin, tuna senso tur rua­hman zat chu cheng vbc. 1011.52 a ni.

Kawngpui km. 87.91-a thuiah hian lei (bridge) pariat dawh tur niin, hmun pahnihah foundation laiin hna thawh mek a ni a, culvert 428 siam turah 303 zawh a ni tawh. Kawng laih loh km. 1.72 a la awm a, heihi kawngpuiin a paltlang tur Zochachhuah khuaa chenna in ṭhiah ngaite'n an la ṭhiah loh vang leh compensation buai vanga hmun ṭhenkhat a kut la thlak theih loh laite a ni.

Kawngpui sial mek hi pakage pathumah ṭhen a ni a, package 1 leh 2 chu June 30, 2018 hmaa zawh tur a tih niin, Myanmar ramri lam dep package-3 chu December 31, 2018-a zo tur a tih a ni thung. Kawng hi km. 39.87 blacktop tawh a ni a, kawngpui blacktop chu metres 7-a zim lo tur niin, lei aṭanga blacktop chung ber thlenga a chhah zawng chu ft. 2.16 tur a ni.