Khawpui fai inelna tur sawiho

India ram pum huap khawpui fai inelna Swachh Survekshan 2018 hnuai­a Lung­lei khawpui fai taka cheibawl a nih theih dan tur ngaihtuahin nimin khan Lung­lei HPC vice chairman S Lalding­liana hoin thuthar thehdarhtute an ṭhukhawm.

S Laldingliana chuan sorkarin kan mamawh tam tak min tihsakte kan ta anga enna chang kan hre tlat lo ṭhin chu inbih­chian a ngai tih sawiin, "Faina kawngah phei chuan nasa zawka inzirtir kan la ngai hle a ni. Swachh Survekshan 2018 hnuaiah India rama khawpui ṭha­hnem takte faina kawngah kan inel dawn a, Mizoram bikah pawh he inelna a tel tur hian Census Town 23 thlan kan ni a, Lunglei khawpui chu India ram huapa a tha ber kan ni thei lo a nih pawhin Mizoram bikah chuan khawpui fai ber kan ni thei a ni," a ti.

Lunglei DUDO Andrew Lalhruaia chuan Swachh Survekshan 2018 hnuai­ah India rama khawpui Statutory Town 4041 faina kawngah inel tur a nih thu a sawi a, "He inelna ah hian zawhna chi hrang hrang chhan tur 500 chuang awm­in kan chhanna angin sorkar laipui aṭangin a endiktu tur an lo kal dawn a ni," a ti a, programme hi mitin in kan hriat chian a ngai a, chumi kawnga mipute hrilhre thei bertu thuthar thehdarhtute chu thawhpuiah a sawm.