Congress sorkar tlak chhan tur chu Kohhran duh loh dana an kal vang - Zoramthanga

MNF president Zoramthanga chuan, Congress party kaihhruai sorkar chu Mizorama kawngpui chhia leh kohhran pawisa loa kohhran duh loh dana an kalah puhin, hengte Congress sorkar tlak chhan tur a nih thu a sawi.

Nimina Bilkhawthlir Community Hall-ah Serlui Constituency MNF Joint block Conference-ah thu sawiin Zoramthanga chuan, "Kohhran pawh pawisa leh mipui pawh pawisa loa heti khawpa kan ram kawngpui chhe ta lutuk hi Congress sorkar tlak chhan tur a ni," a ti a; High Court-in Mizo Carbon chung­chang CBI chhui tura a duh avang­in Mizoram hotupa ber a tâlbuai nia sawiin, "Mi rûm ṭhaih chíng Congress sakei kha an kâp thlu a, a hlauhawm tawh lo," a ti.Zoramthanga chuan, MNF party-in sorkarna an chelh hmasa chhungin thiam tâwk lohna tam tak a awm tih sawiin, mipui hnenah ngaihdam a dil nawn leh a; "Kan sorkar laia kan thiam lohna leh tih dik tawk lohnaah ngaihdam kan dil a, thil tam takah a ṭha zawngin insiamṭhatna hun Pathianin min siamsak a, Zoram mipui tana malsawmna ṭha zawk nih ngei kan tum," tiin, MNF an sorkar chuan chhungkaw tin hnenah eizawnna ngêlnghet an neih theih nan Rs. 3,00,000 aia tlem loa bul ṭantir an tum thu a sawi.

MNF thuchhuah chuan, Bilkhawthlira vantlang inkhawmah hian MNF zawm thar mi 781 chu MNF President-in an party-ah a lawm lut niin a tarlang.