Chhiatrupna laka inven dan tur sawiho

Lawngtlai District Disaster Mangement Committee (LDDMC) chu nimin khan an chairman, DC Dr Arun T hoin DC conference hall-ah an ṭhukhawm a, chhiatrupna laka inven dan tur leh rikrum thila hma lak dan tur hrang hrang an sawiho.

Lawngtlai DC chuan Lawngtlai chu lei min hlauhawmna hmuna awm a nih avangin chhiatna thleng thei laka lo inven leh lo inhmakhua lawk a ṭul thu sawiin, "LDDMC pawhin chumi lam hawia chak taka hma lak a pawimawh," a ti a, member-te chu thurawn pe tur leh ṭha taka thawhhopui­ah a sawm nghal a ni.

Meeting-a tarlan a nih danin, chhiatna a thlena rang taka hma lak a nih theih nan leh thuneitu lamte hriattir vat a nih theih nan Lawngtlai district tan a thlawna biak pawh theihna tur (toll free no) siam a ni a, 1077-ah hian eng lai pawhin biak theih a ni.

Disaster Response Vehicle thar ruahman a nih bakah, DMR dept. hnuai­ah ṭanpuina hna thawhna kawnga hmanraw pawimawh tur eng emaw zat lei belh a ni. Chhiatna thlen thulha hma lak dan tur ruahmanna Lawngtlai District Disaster Mangement Plan chu pawh ṭha zawka siam leh tihchangtlun tum a ni bawk.