KHAWTHLIR

NDRF awmna, Lungverh leh a chhehvel containment zone-a puan tawh chu Aizawl DC R Lalramnghaka chuan nimin khan a hlîp. NDRF mi leh sa eng emaw zatin Covid-19 an vei avangin Lungverh leh a chhehvel hi July 7, 2020 khan containment zone-ah puan a ni a, Aizawl West CMO-in July 27 khan Lungverh leh a chhehvelah hripui a darh a hlauhawm tawh loh thu a tarlan avangin, containment zone a nihna chu hlih a ni ta a ni. Covid-19 vei NDRF mi 32 zinga 13 chu chhuahtir tawh an ni.

Government deputy chief whip Lalrintluanga Sailo chuan, a bial chhung mi HSSLC 2020-a Arts-a 10-na Jessica Ramdinpuii West Phaileng hnenah nimin khan a pisaah chawimawina leh lawmpuina hun a hmanpui a; lawmpui nan laptop a hlân. Lalrintluanga Sailo chuan, a bial chhunga sikulte'n pass percentage ṭha tak an neih avangin a lawm thu leh zirna lama Dampa bial tihhmasawn nan hma a lak zel dawn thu a sawi.

Central Association Private Security Industry (CAPSI) chuan CAPSI, Mizoram Chapter convener atan Lalthangzauva Pachuau a ruat. Lalthangzauva hi PL Security Guard & Labour Supply Agency neitu a ni a, Mizoram Private Security Agency Association-ah president a ni mek. CAPSI hi India rama private security agency-te khaikhawmtu páwl a ni.

Aizawl DFO office leh Excise & Narcotics department chuan nimin khan Rangvamual leh Phunchawngah joint operation an nei a, dan phal loh tih eng emaw zat an man. EFCC department leh END mite hian zu leh a kaihhnawih bakah, dan loa meihawl hman zawn chhuah hna an thawk a, meihawl ip 341, rakzu litre 150, zu bilh lai ṭín 1,600, zu thlawrna bél 41 an man a, zu thlawrna hmun 22 an tichhe bawk. END tarlan danin tunlai hian dan kalha zu siamna atan zu siamtute dan kalha siam meihawl an hmang nasa hle.