Minister-in Green Ag Project a hawng

Agriculture minister C Lalrinsanga chuan nimin khan SAMETI Conference Hall, Aizawl­ah 'Green Ag: Transforming Indian Agriculture for Global Environmental Benefits and the Conservation of Critical Bio-diversity and Fo­rest Landscapes’ (Green Ag Project) a hawng.

CLalrinsanga chuan, Green Ag chu project danglam bik, thiamna inhlan chhawnna project, ram pawn aṭanga sum hmuh hmanga kalpui tur a ni tih sawiin, "Khawvel hmun hrang hrang aṭanga mithiamte nen thawkhoin hmalak a ni dawn. Global Environment Facility funding niin, UN péng pakhat FAO-in a thawk thung a, Mizorama protected area lian ber pahnih Dampa Tiger Reserve leh Thorang Wildlife Sanctuary-te a tuam dawn a ni," a ti.

Green Ag project chu Uttarakhand, Odisha, Madhya Pradesh leh Rajasthan-ahte kalpui mek a ni tih sawiin Minister chuan, "Mizoram chu India ram state tlemtê zinga hma hruaitua a awm thei hi a lawmawm hle a ni," a ti a; project-a thawk zawng zawngte chu technical support group leh line department-te nen ṭanghoa ṭhahnemngai taka thawk turin a chah.

Agriculture Minister sawi danin, Green Ag project-ah hian Thorang Wildlife Sanc­tuary leh Dampa Tiger Reserve bul hnaia khua 30-ah ṭha zawk leh awmze nei zawka an nitin eizawnna an kalpui zel dan tur te, ṭha leh hlâwk zawka thlai thar dan tur te, tlang ram loneih dan ṭha zawk kawhhmuh te, sik leh sa inthlak danglam nasat vanga loneih dan inthlak leh nghawng nasa tak do te, thing leh mau leh nungcha humhalhte a tel a ni.

Project hawnna inkhawm hi Agriculture secretary Lalhmingthanga'n a kaihruai a; Food and Agriculture (FAO) India aiawh Tomio Shichiri, Green-Ag Project senior forestry officer Dr Thomas Hofer ten video conference kaltlangin Green-Ag Project kalphung an sawifiah.