Mipui him nan sorkarin theihtawp a chhuah zel dawn - Lalchhandama Ralte

East Tuipui biala lìr­nghîng vanga mangang leh thlaphânga awm mekte thlamuan tura kal minister of state Lal­chhandama Ralte chuan, lirnghing laka mipui himna turin sorkarin theih­tawp a chhuah zel dawn thu a sawi.

Minister hian nimin khan Khuangleng, Leithûm, Dungtlang, Sam­thang, Khuang­thing leh Zawlsei khuate tlawhin, lirnghingin a sâwi ṭhin vanga mahni in chhungah riak ngam lo khawpa an awm chu sorkarin a tuarpui a, pawi a tih thu a sawi a, "Co­vid-19 hripui léng vangin sorkar hnathawkte hlawh pe kim thei lo dinhmunah sorkar chu ding mah se la, sorkar­in mipui himna a ngai pawimawh a, a thawh theih ang angte a thawk dawn a ni," a ti.

Sorkarin hmalak dan tur a dap tih sawiin Lalchhandama Ralte chuan, "Rajya Sabha MP K Vanlalvena pawhin Delhi-ah mi pawimawhte hmuin, mithiamte tíra enfiah turin a ngen a, mahse, tunlai boruakah rawn zin hleih theih a ni lo," a ti a; Mizorama mithiamte'n chhiat­naa sorkar tih theih tur leh hmalakna tur rawtna an siamte a theih ang anga thlir zui zel a nih tur thu a sawi. Lalchhandama Ralte leh amah ṭawiawm­tu C Lalmuanpuia, MLA-te chuan khaw hrang hrangah riahbûk sakna atan silpauline leh pawisa an hlàn a ni.