Phûl lem phahna tur lungphùm phúm Budget ei hêk loin rahbi kan tuk - Robert Romawia

Sports & Youth Services (SYS) minister Robert Romawia Royte chuan nimin khan Muallungthu hockey ground-a phûl lem phah tur lungphùm a phúm. Minister chuan, Mizoram budget ei hêk loin SYS department-in rahbi a tuk mek thu a sawi.

Robert Romawia chuan, Mizoram sorkar leh mipuiin Covid-19 vangin sum a mamawh tam thu sawiin, "Hetiang a nih laia Mizoram budget ei hêk loa SYS department-in hmasawnna rahbi a tuk mek hi a lawmawm. Covid-19 vanga infiam theih loh lai hmang ṭangkaia MSSC-in field leh infiamna hmun tam tak chei ṭhat leh siamthar hna a thawk hi a remhriatthlak hle," a ti.

Sports Minister chuan, zirna, thiamthil leh infiamna lamah hmasawnna tluantling a thlen theih nan sports school ṭha Mizoramin a mamawh tih hriain hmun pangaah residential sports school din turin ruahmanna siam a ni tih a sawi a, "Central sorkarin cheng nuai 16751.70 a sanction a, 50% chu department-ah allocate a ni tawh," a ti a; sikul pangaah chuan zirna ṭha dawng chungin zirlaite'n infiamna lam an zir tur thu a sawi.

New Education Policy siam mek angin sport leh physical exercise chu co-curricular activity (zirna péng khat) ni tawh loin, curriculum (zirna pangngai)-ah a tel tawh dawn tih sawiin Robert Romawia chuan, "English, mathematics subject-te angin sports chu subject a ni tawh dawn. He ruahmanna thar avang hian Mizoramin nasa takin sport infrastructure siam belh kawngah ṭan lâk a ṭul a ni," a ti.

Mizoram State Sports Council secretary C Laltlanthanga sawi danin, hockey ground hi Khelo India Scheme aṭanga sum hmuh cheng nuai 550 hmanga siam tur a ni a, state share ngai loin sorkar laipuiin a tum vek dawn. Standard size, a dung metre 91 leh a vâng metre 55-a siam tur a ni a, ṭha taka hung tur a nih bakah, mamawh dangte pawh siam tel a ni ang.

Lungphùm inkhawmah hian Lok Sabha MP C Lalrosanga, bialtu MLA Prof. F Lalnunmawia leh hockey player - FIH Rising Star of the Year dawngtu Lalremsiami te pawh an tel a ni.