Mizoram sorkarin OMB hmangin Cheng vbc. 100 a pûk leh dawn

Mizoram sorkar chuan open market borrowing (OMB) hmangin loan cheng vaibelchhe 100 a pûk leh dawn. Sorkar kum kal mek, 2022-23 chhungin Mizoram sorkar chuan OMB hmangin ṭum nga loan a pûk tawh.

Vanglaini thu dawn danin, Mizoram sorkarin OMB hmanga sum a pûkna tura tih tur ṭulte chu Reserve Bank of India (RBI) chuan a buaipui a, nimin khan tihfel hman beisei a ni.

OMB hmanga sum pûk a nih theih nan RBI-in state sorkar tan sum pûk tur a zawng a, financial institution-te'n an chháng ṭhin. Nimin kha Mizoram sorkar sum pûk tur chhang duh tana RBI-in chhanna hun a hawn ní a ni a, nimin vêk khan a chhángtu an puang nghal.

OBM hmanga sum pûk chu kum khatah a pung vawi hnih rulh tur a ni a, kum 10 chhungin pawisa pûk zawng zawng rulh a ngai a; a punna chu 7-8% a ni.

Hriat theih chinah sorkar kum kal mek chhungin Mizoram sorkar chuan OMB hmangin ṭum nga loan a pûk tawh a, a pûk zat belh khawm chu cheng vbc. 640 a tling.

Financial year 2022-23 chhunga OMB hmanga RBI aṭanga sum pûk phalna Mizoram sorkarin a neih zat chu cheng vaibelchhe 990 a ni a; tun dinhmunah cheng vbc. 640 pûk a ni tawh a, cheng vbc. 100 a pûk leh chuan, cheng vbc. 740 a pûk dawn ta a ni.

Hetih lai hian, Mizoram sorkar chuan sorkar kum kal mekah OMB tiamin, hmun hrang hrang pali aṭangin loan cheng vbc. 726.35 a pûk tawh. OMB hmanga a pûk leh tur nen kumin sorkar kumah cheng vbc. 826.35 a pûk dawn tihna a ni.