Leiṭha siamna Chief Minister-in a hawng

Agriculture department-in Agriculture Research Farm, Sihphir Neihbawia an siam, OP-12 Bio-fertilizer Production Unit thar chu nimin khan chief minister Zoramthanga'n a hawng. CM chuan, Mizoramin agriculture leh horticulture hmangin sang taka economy chawi kânna tur theihna a neih ṭhat thu a sawi.

OP-12 Bio-fertilizer Production Unit hi loneitute'n chemical fertilizer tel loa hlâwk zawka thlai an thar theihna tura ruahman a ni a; kum thum chhung SEDP hnuaia kalpui turin kum 2019-ah project pawm niin, cheng nuai 125.31 ruahman a ni.

Bio-fertilizer siam chhuahah micro-organism kengtu atan Talc Powder hman a ni a, thla ruk chhung dahṭhat theih a ni. Buh leh thlai chi hrang hrangah a chi chiah nan (seed treatment) leh leilung sâwngbàwlna atan hman theih a ni a, batch khatah biofertlizer quintal 18 siam theih a ni.

CM Zoramthanga chuan, OP-12 Biofertilizer Production Unit chuan agriculture leh horti­culture kalphungah nasa takin hmasawnnaah danglamna a siam a beisei thu a sawi a, "Leilung nghênga eizawnna, a bik takin agriculture leh horticulture kan tihte hmanga sang taka economy khai kân theihna Mizoramin a nei ṭha hle a, chung zinga pawimawh tak pakhat chu leiṭha a ni," a ti.

Chief Minister chuan, mahni ram ngeia fertilizer ṭha leh him siam chhuah a ni chu ropui a tih thu sawiin, "Thar chhuah tam lamah thui tak a puih ngei ka beisei," a ti a; hmasawn zel duh avanga hmathlir ṭha tak nena kut hnathawktu intêl khawmna cooperative society chu a ngêlngheh avangin hlawhtlin a awl zawk niin a sawi.

Agriculture minister C Lal­rin­sanga chuan, Agriculture depart­ment hmalaknate sawiin, NABARD RIDF hnuaiah Lengpuiah Biocontrol Laboratory din mek a nih thu te, North Eastern Council hnuaiah Thingdawl Agriculture Farm-ah Aeroponic Technology hmangin alu chi siamna tur project kalpui mek a nih thute a sawi.

OP-12 Bio-fertilizer Production Unit project hnuaiah hian Mizoram University chuan hmun hrang hrang aṭanga soil sample-te la khawmin, Mizoram leilunga hrik ṭangkai (plant growth promoting bacteria)-te zirchianna an nei mek bawk.

Hawnna inkhawmah hian Agriculture Development Board vice chairman H Biakzaua, MLA, Agriculture secretary J Hming­thanmawia leh director James Lalsiamliana bakah, loneitute an tel a ni.