In sak ṭanpuina Mizoram sorkarin A khawih chingpen - Mizoram BJP

BJP, Mizoram Pradesh hruaitute chuan nimin khan Aizawl Press Club-ah thuthar thehdarhtute an kâwm a; sorkar laipui scheme, in sak ṭanpuina Pradhan Mantri Awas Yojana (PMAY) khawih chingpenah Mizoram sorkar an puh.

Mizoram BJP thupuangtu K Laldinthara chuan, PMAY tum ber chu mi harsa, in nei lote in dinsak a nih thu sawiin, "Kum 2011 Socio Economic and Caste Census (SECC) behchhanin a dawng turte thlan a ni. Mizoram sorkarin central aṭanga pek tur an tihte nasa takin an khawih chingpen a, party induhsakna atan an hmang a ni," a ti.

K Laldinthara chuan, sorkar laipui aṭanga ṭanpuina dawng tur list-a tel zinga tam takin an dawn loh thu sawiin, "Central sorkarin PMAY dawngtute hnenah lawmpuina/ hriatpuina a thawn hlawm a ni," a ti a; lehkha dawng si, a taka ṭanpuina dawng lo tam tak an awm thu a sawi.

BJP thupuangtu sawi danin, PMAY dawng tur thlan dan a fel loh avangin kum 2011 list-a mite pawh in sakna tur pek zawh a la ni lo. An pek chhun angte pawh first instalment chauh dawng, second instalment la pek loh tam tak an awm.

A nihna tur angin ṭanpuina sem ni se chuan, kum 2012 hnu lama mite tan pawh sem leh theih reng tawh a ni. State dang chuan phase-II an kai tawh a, Mizoramah chuan state sorkar inthlahdah vang liau liauin mi retheite'n an chanvo an chang thei lo niin an sawi.

BJP hruaitute chuan, hman ní lawka Union Minister a rawn kal ṭumin central aṭanga in sakna tur sum rawn kal zinga 40% chauh hman a nih thu an lo hriattir tih a sawi a, "A pawi hle a ni. 60% hi in nei lo leh sak ṭhat ngaite hnenah rang taka pe chhuak ngei turin Mizoram sorkar kan phût a ni," an ti.