Kuhva hralh theih loh vanga harsatna MLA-in Prime Minister hnenah a thlen

MLA Lalrindika Ralte chuan a bial, Hachhek huam chhung leh Mizoram khawthlang lama kuhva chíngtute'n kuhva hralhnaa harsatna an tawh chungchang chu nimin khan Prime Minister hnenah ziakin a thlen a, hma la turin a ngen.

Prime Minister hnenah hian Lalrindika Ralte chuan, Hachhek bial chu Mizorama kuhva thar tam ber a nih thu leh mipui zinga 70% vel chu kuhva chínga ei zawng an nih thu a tarlang a; Myanmar aṭanga kuhva tawlhrûk titawp tura Mizoram sorkar hmalaknain beisei a pha lo hle a, dan loa kuhva sumdawnna tun thlengin tihtawp a la nih loh thu a tarlang a ni.

Lalrindika Ralte chuan, Mizoramah Myanmar aṭangin kuhva ro a luh nasat avangin Home Ministry inrawlhin, dan loa kuhvaa sumdawnna titawp turin Mizoram leh Manipur sorkar a hriattir tih a tarlang a; Assam sorkar pawhin an state chhunga Myanmar kuhva lut tur khauh taka an vên mek thu te, Mizorama thar kuhva rahte pawh Myanmar aṭanga lak luh anga ngaiin an dan vek thu leh, Mizoama kuhva chíngtute'n an kuhva tharte an hralh theih loh phah thute a tarlang bawk.

Hachhek bialtu MLA chuan, Myanmar aṭanga dan loa kuhva tawlhrûk tihtawp a nih theih nan chak zawka hma la tur leh Mizorama kuhva chíngtute'n an kuhva thar an hralh theih nana hma laksak turin Prime Minister a ngen a ni.

Lalrindika Ralte hian nimin vêk khan Hachhek bial mipui hnenah thuchah a tichhuak a; kuhva rah hralhnaa harsatna nasa tak an tâwk chu pawi a tih thu leh a rang thei ang bera chinfel ni se a duh thu a tarlang a, "Mi duhâm tlemtê thunun lohte vanga he harsatna hi tâwk kan ni. Mahni mihringpuite'n tuar dawn mah sela pawi ti lo khawpa mahni hmasial an awm hi a pawi hle a ni," a ti.