CM hoin National Highway dinhmun sawiho

Chief minister Zoramthanga hoin nimin khan Chief Ministers' Office conference hall-ah sorkar hotute'n Mizoram hmun hrang hranga National Highways Infrastructure Development Corporation Limited (NHIDCL) hnathawh mek dinhmun leh harsatnate an sawiho.

Ṭhutkhawmah hian NHIDCL hnathawh dinhmun leh harsatna hrang hrang sawiho a ni a; Vairengte-Sairang kawng (NH-306 & 6), Lunglei-Tlabung (NH-302), Seling-Dulte (NH-6), Chhiahtlang-Serchhip By-pass (NH-53), Keifang-Tuivai (NH-102B) leh Tuipang (NH-54)-a forest clearance chungchang te, utility shifting chungchanga Power & Electricity department nena an indawr meknate enho a ni.

Hna thawh theih hun chhung (working season) laia a tam thei ang ber thawh a nih theih nan harsatna hrang hrangte chu a ṭul anga sorkar laipui hotute hnena thlen ngaite chu thlen ni se, an ti a; bypass road siam belh tur, sorkar laipuia la nawr ngaite sawiho a ni bawk.

Ṭhutkhawmah hian Land Revenue & Settlement minister Lalruatkima, adviser to CM C Lalramzauva, adviser to CM (Techncial) K Lalsawmvela, EFCC secretary Navin Kumar Choudhary, PWD secretary K Lalthawmmawia bakah, Land Revenue & Settlement leh Power & Electricity department hotute an tel a ni.