SEDP hi harsa zawk tan scheme ṭha a ni - Robert Romawia Royte

Nimina Mizo Hnam Rûn inkhawma thu sawitu MNF adviser Robert Romawia Royte chuan, SEDP chu mi rethei leh harsa zawk tan direct benefit scheme ṭha tak a nih thu a sawi.

Robert Romawia Royte chuan, "SEDP hi mi hausa tan a ṭangkai lo mai thei. Mi rethei leh harsa zawk tan chuan direct benefit scheme ṭha tak a ni. Dik takin kalpui ila, party danga mi harsate pawh i thlang zel ang u," a ti.

MNF chu an tlo hle nia sawiin Robert Romawia chuan, "A la vul tulh tulh dawn. Kan pian hma daih pawhin MLA pathum an lo nei daih tawh a, party upa leh party vul reng a ni," a ti a; MNF zawm tura thutlukna a siam chu a tihsual loh thu a sawi.

MNF Adviser chuan, kum 2018 inthlanpui hnuah ZPM party-in MLA pahnih an chàn tawh thu sawiin, "MNF-in pahnih kan neih belh. Inthlan hrang hrangah MNF dinhmun a ṭha hle a, inthlanpui hmachhawn chu thil nghahhlelhawm tak a ni," a ti.

Citizenship Amendment Act (CAA) chu a hlauhawm lo nia sawiin Robert-a chuan, "Mizoram Lok Sabha MP-in CAA a vote kha hmarchhak state duh loh dana an tihdanglam vang a ni. CAA original kha kan duh lo, Mizoram Council of Minister ṭhutkhawmah pawh India rama duh lohna resolution pass hmasa ber kan ni a, a awm chhun kan ni hial mai thei," a ti a; Parliament-in CAA a tihdanglam avangin Mizoram MP-in CAA a vote niin a sawi.

Robert Romawia chuan, Congress party president atan Lalsawta an ruat chhan nia a rin sawiin, "Inthlan leh hunah Congress hi an la tling dawn chuang lo a, anmahni tlâkpui turin tuna an president hi an dah a ni," a ti. ZPM chungchangah, "Party pakuaa zuang lâwr tawh hi chief minister an la awm ngai lo. Kum 2023 hnu lamah chuan an kiam tawh ngawt ang," a ti bawk.