Aizawl leh district khawpui tinah Gas home delivery kalpui dawn

Aizawl leh district khawpui tinah December 1, 2022 aṭangin eirawngbawlna gas home delivery (consumer-te ina dah) kalpui ṭan a ni dawn. LPG home delivery-ah hian consumer-te'n gas man bakah, delivery charge Rs 70 aia tam lo an chawi belh a ngai dawn.

Sorkar thuchhuah tarlan danin, LPG home delivery chungchangah hian Food, Civil Supplies & Consumer Affairs Secretary chuan November 1, 2022 khan hriattirna a tichhuak a; December 1, 2022 aṭangin Aizawl Municipal Corporation huam chhung leh district khawpui zawng zawngah LPG consumer-te inah eirawngbawlna gas pek ṭan tura tih a nih thu a tarlang.

May 3, 2019 khan Aizawl khawpuia veng pali-ah enchhinna atan LPG home delivery kalpui ṭan a ni a, tunah hian Aizawla veng 29-ah kalpui mek a ni.

LPG home delivery chungchangah Ministry of Petroluem & Natural Gas-in Liquified Petroleum Gas (Regulation of Supply & Distribution) Order 2000 dated 26.04.2000-a thupek a chhuah angin, sorkar enkawl oil company phalna la hmasa loin distributor-te'n an hnena consumer inziak lutte hnenah home delivery an ti lo thiang lo. Chutih rualin, state sorkarin ram leilung awm dan leh distributor-te kal kualna tur ngaihtuah chungin home delivery atana consumer-te'n pawisa an chawi belh tur a tuk thei thung.

Ministry of Petroluem & Natural Gas-in hriattirna a chhuah zûlzuiin Mizoram sorkar chuan distributor-te'n home delivery atan consumer-te hnen aṭangin Rs 70 an lak belh theih turin ruahmanna a siam a ni.