ZPM hi T Sailo-in a ngaih pawimawh tipuitling thei tur awm chhun a ni - Lalduhoma

ZPM leader Lalduh­oma chuan nimin khan ZPM pisaa inkhawmah thu sawiin, chief minister hlui Brig. T Sailo-in a ngaih pawimawh em em kawlphetha chungchang leh basic need a tihte tipuitling thei tur awm chhun chu ZPM a nih thu a sawi.

Lalduhoma chuan ZNP din thar lehtu, eng emaw vanga la khawtáng rihte chu ZPM-ah haw khawm turin a sáwm a; "Brig. T Sailo-in a ngaih pawimawh em em power chungchang leh basic need tihte hi a kengkawh zeltu leh tipuitling thei tur awm chhun chu ZPM hi a ni. Brig. T Sailo zirtirna pawm a, a hlawhtlin duh tak takte chu ZPM-ah hian an awm turah ka ngai," a ti.

ZPM chhiatna turin ṭawngchhe tinreng leh dik leh dik lo pawh dáwn loa beihna an tâwk mek nia sawiin Duhoma chuan, "Heng hi kan tan malsawmnaah a la chang thei. A dawnsawn dan kan thiam chuan kan tan malsawmna thlentu a ni mek reng a, a ni zel dawn. Min beitute beih lêt a ṭul ber lo, Pathian i ngaichâng ang u," a ti a; ZPM chu an ṭhang zel a, an êngin a chhun phâk chin pawh a zau tawh hle niin a sawi.

Lalduhoma chuan, sorkarna chang turin an thawhrim a ngai tih sawiin, "Pathian malsawmna dawng tlakin kan zavaiin rim takin i thawk ang u. Mi aia kan thawhrim chuan Pathianin mal a sawm ang a, kan sorkar ngei ang tih ka ring tlat a ni,” a ti.

ZPM working president K Sapdanga pawhin thu sawiin, chhan hrang hrang avangin tun hnaiah mi tam tak ZPM-ah an haw khawm tih a sawi a, "He pawl kalphung rinna avanga mite an lo tlânkhawm hi a hlu lehzual a, ZPM kalphung rinna hi kan rilru puthmang ni zel turin kan duhthusam a ni," a ti a; ZPM member nih ṭul ti lo, páwn lam aṭanga venpui tum mi ṭhahnem tak an awm thu a sawi bawk.

ZPM inkhawm hi president Lalliansawta'n a kaihruai a; Working President-in ZNP din thar leh tute leh mi dang eng emaw zat, an vaiin mi 130 ZPM-ah a lâwm lut niin ZPM thuchhuah chuan a tarlang.