KHAWTHLIR

Thisen pe
Aizawl North College NSS unit leh Lengteng Youth Adventure Club chuan nimin khan an college-ah thisen pek an huaihawt a, Civil Hospital, Aizawl tan thisen unit 116 an pe a, petute mipa 90 leh hmeichhia 26 an ni.

CM-in lawmpui
Chief minister Zoramthanga chuan nimin khan a pisaah 36th National Games 2022-a Mizoram tana Judo (kg. 52) huanga gold medal latu Lalhumhimi hnenah lawmpuina thuziak leh Rs 10,000 a hlân.

A thlawnin enfiah
Blessino Nursing School chuan an zirna-in din champha lawm nan nimin zing khan Maubawk kâwnah a duh apiang tan a thlawna blood pressure enfiahna an kalpui a, Rs 20-in blood sugar an enfiahsak bawk. Mi ṭhahnem takin BP leh blood sugar an enfiahtir a ni.

Hlawh la pe lo
Mizoram sorkar chuan sorkar hnathawk (regular)-te October 2022 thla hlawh tur nimin thleng khan a la pe chhuak lo. Hetih lai hian, sorkar hna a nghet loa thawk - provisional employee, muster roll-te hlawh tur erawh pek chhuah tawh a ni.

Kawng siam zo
Serchhip Sailiamkawn leh Keiṭum inkar, NH-54 kawngpui siam mek vanga Sailiamkawn aṭanga Dawngzawl inkara pumpelh kawng siam chu lirthei - two wheeler leh LMV tan zawh theih turin peih a ni tawh tih Serchhip SDO (C) Lalzikpuii'n a tarlang.

ATM booth hawng
Assam Rifles 23 Sector ram chhung, CSD Canteen bula Bank of Baroda-in ATM booth an dah thar chu nimin khan AR 23 Sector commander Brig. Digvijay Singh-a'n a hawng.

Sarâng man
Siaha district Single Use Plastics Enforcement Team chuan nimin khan Siaha khawpuia bazar leh dâwr hrang hrangah hman khat daih sarâng (single use plastic) zawrh leh hman a awm leh awm loh an endik a, eng emaw zat an man. Enforcement Team hi additional DC Lalnunmawii leh MADC LAO K Beingiachhie ten an ho a ni.