Health care atan SEDP aṭangin Sorkarin cheng vbc. 20 a pe

Mizoram sorkar chuan Mizoram State Health Care Scheme (MSHCS) hnuaia medical bill atan Socio Economic Development Programme (SEDP) aṭangin tun hnai khan MSHCS hnenah cheng vbc. 20 a pe.

October 7, 2022 khan Mizoram sorkar chuan MSHCS hnuaia damlote bill táng mek pek a nih thei nan cheng vbc. 20 pek a nih dawn thu a puang.

Sorkar thuchhuah tarlan danin, MSHCS-a inziak lut damlote inenkawlna senso phuhrûkna turin October 7, 2022 khan Planning & Programme Implementationdepartment-in SEDP sum, untied fund aṭangin cheng vbc. 20 a ruahman a ni.

Vanglaini thu dawn danin, SEDP sum hi MSHCS chuan tun hnai khan an dawng a, damlo bill tángte hnena pek chhuah turin an buaipui mek. Cheng vbc. 20 hi bill tángte hnenah tun kara an pek hman loh pawhin, kar leh lamah chuan pek chhuah hman ngei an tum.

Cheng vbc. 20 hian kum 2021 chhunga health care bill báte a la daih dawn lo a, September 2021 leh a hma lama bill lut eng emaw zat a daih tura ngaih a nih rualin, a la daih kim dawn lo nia thu dawn a ni.