Kum 11 chhungin TB vei 24,977 hmuh a ni; Kum 2021-22 chhungin TB vangin mi 75 thi

Kum 11 chhung, kum 2011-12 leh 2021-22 inkar khan Mizoramah ngawr natna, Tuberculosis (TB) vei mi 24,977 hmuh chhuah a ni. Sorkar kum liam ta, 2021-22 chhungin TB vangin mi 75 an thi.

Mizoram Statistical Abstract 2021, tun hnaia Economics & Statistics department-in an tihchhuaha a lan danin, financial year 2011-12 leh 2020-21 inkar chhung khan Mizoramah mi 1,07,998 endik aṭangin TB vei mi 23,279 hmuh chhuah a ni a; endik zat aṭanga TB vei zat percentage chu 21.56 a tling.

TB vanga thi zat erawh tarlan a ni lo. TB vei leh vei loh endik tam ber kum leh TB vei hmuh chhuah tam ber kum chu 2019-20 kha a ni a, mi 17,232 endik niin, TB vei 2,962 hmuh chhuah a ni.

Kum 10 chhunga hmuh chhuah tlem ber kum, 2014-15 chhungin mi 1,628 hmuh a ni thung. Revised National Tuberculosis Control Programme tarlan danin, sorkar kum liam ta, April 2021 - March 22 chhung khan Mizoramah mi 6,745 endik aṭangin TB vei mi 1,698 hmuh chhuah a ni a; TB vangin mi 75 an thi.

Kum 2021-22 chhunga TB vei hmuh chhuah mi1,698 zinga 1,694 (99.76%)chu HIV an vei leh vei loh endik a ni a, endik mi  1,694 zinga mi 289 chu HIV vei niin, positivity rate chu 17.06% a tling.

Mi 1,698 zinga 1,314 chu Covid-19 an kai leh kai loh endik a ni bawk a, mi paruk (0.45%)-in Covid-19 an vei a ni. Sorkar kum liam taa
TB vei hmuh chhuah mi 1,698 zinga 1,670 (98.58%) chu Diabetes Mellitus an neih leh neih loh endik a ni a; TB vei mi 1,660 chu meizûk dan dinhmun endik niin, mi 407 chu To b a c c o C e s s a t i o n Clinics (vaihlo sim duhte enkawlna hmun)-ah kaltir an ni. TB vei zinga mi 1,698 zinga mi 262 chu zu in ṭhin an ni a, 15.42% an tling.

Kum 2021-22 chhungin mi 2,634 chu MDR-TB an vei leh vei loh endik a ni a, MRB-TB vei mi 109 enkawl an ni. TB vei hmuh chhuah zinga a tam zawk, 90.57% chu enkawl dam an ni bawk. Mizoram Statistical Abstract 2022-ah hian district thar pathum - Saitual, Khawzawl leh Hnahthial district-te dinhmun a hranpaa siam a ni lo.