Ṭha lo tih hriat reng kan la vote zel hi Kan ram tichhetu pakhat a ni - Duhoma

ZPM leader Lalduhoma chuan, Mizoram tichhetu leh a ṭhat theih loh chhan pakhat chu, mipuiin anmahni bumtute an la zui zel leh an ṭha lo tih hriat chian reng tawh pawh an la vote zel ṭhin chu a nih thu a sawi.

Lalduhoma hian nimin khan ZPM, Kolasib Block-in Diakkawn YMA Hall-a block conference leh political training an buatsaihah thu sawiin, "Kan ram tichhetu pakhat chu min bumtu kan la zui zel te, an tana ṭhahnemngai taka kan la campaign hi a ni. Eng vangin nge kan ram a ṭhat theih loh kan tih chuan, an ṭha lo tih kan hriat reng pawh kan la vote zel hi a ni," a ti.

Hruaitu ṭha lo zui tlat chu ramin a tuar tih sawiin Duhoma chuan, "Hlemhlêtna hi kan hua a, ṭhalaite chauh ni loin, kohhran hial a au chhuak a, Central YMA hial an au chhuak ta," a ti a; sorkar ṭha siam turin Mizoram a insingsa a, political party ai mahin neutral hoin inthlan an nghakhlel tawh niin a sawi.

ZPM working president K Sapdanga chuan, Mizoramah danin zawm a hlawh lo a, dan lo ang zelin an kal tih sawiin, "Laloo-a chuan sorkar project awm sa aṭangin hlêp rûk dan a dap a, kan ramah chuan hlêp rûkna tur remchang atan project siam tur kan dap thung. Laloo-a hial pawh kan awt ṭan ta. Tunah chuan hlêp rûk tur takngial pawh sum kan nei tawh lo a, a theihna apiang ami a pung awmin kan pûk a, India ram state zinga pûk huai ber kan ni," a ti.

Danin a kawng a zawh hun a la awm dawn tih Mizoram Chief Minister hrilh turin a mi awih zawngte a duhsak tih sawiin Sapdanga chuan, "Tuna Mizoramin a mamawh hmanhmawhthlak ber chu CM mumal neih a ni," a ti. ZPM a sorkar a nih chuan dan a zalên tawh dawn tih sawiin, "Chhungte sum hawha corruption chûl mâm mai mai a rem tawh lo ang," a ti a; sum indaih loh vanga harsatnate sutkian dan awmze nei ber chu inrenchem leh sum hmanna ṭul lo 'cut' ngam a nih thu a sawi.

K Sapdanga chuan, Mizoram chu sorkar siam chakai farm nei hmasa ber leh a awmchhun nia a hriat thu te, MCS/MPS tharte appointment letter chu peon semtir ṭhin a nih laiin, CM-in sem a chuh a, a sem chu kalphung mak tak a nih thu a sawi bawk.

I n k h a w m a h h i a n T B C Lalvenchhunga leh Baryl Vanneihsangi te pawhin thu an sawi a; ZPM zawm thar mi 630 an lawm lut niin ZPM thuchhuah chuan a tarlang.