NH zauh tur ṭhen dan Governor-ah thlen tum

MJA, Kolasib district chuan, National Highways and Infrastructure Development Corporation Ltd (NHIDCL)-in NH kawngpui an zauh turah Assam lam aṭanga enkawl tura Vairengte hmàr lam rìn luh a ni chu state pahnih ramri thlenga la kâng kai thei a nih avangin siamṭhat a nih theih nan Governor hnenah thlen an tum.

Kolasib MJA hruaitute November 7, Thawhṭannia ṭhukhawm chuan, NHIDCL-in NH-6&306 kawngpui zauhna tur an buaipui meka package ṭhen danah, Vairengte khaw chhunga hmar lam ram eng emaw zat Assam lama NHIDCL khawih tura dah a ni chu ṭha lo an tih thu an tarlang.

Saihapui-V lamah pawh a hmain Assam lamin interlocking block phahin kawng an siam tawh a, chu chu tun thlengin Assam sorkar hnuaiah a awm zui tâk thu leh, Mizoram lam aṭangin dodalna a awm loh thu an sawi a ni.

Kolasib MJA hruaitute sawi danin, tun hma chuan Mizoram PWD-in Lailapur khaw chhung thleng kawngpui siam leh enkawl hna an thawk ṭhin a, tun hnaia ramriah neuh neuh a awm tâk hnuah Lailapur mi ṭhenkhatin Mizoram PWD-in kawngpui an enkawl chu duh loin Assam sorkar an nawr a, chumi kal zelah chuan Mizoram lama Lailapur tawn tirh, mandir bul thlengin Assam PWD-in an enkawl tawh a ni.

NH kawngpui zauh turah Vairengte police gate bulah package ṭhen a nih chuan nakin zela ramri buaina a awm leh palhah Assam lam tan ramri ṭan chhan remchang a nih theih dawn avangin, NHIDCL-in package 2 an ṭhenna chu thlak leh a nih theih nan Kolasib MJA chuan Governor hnenah ziaka thlen an rêl a; Chief Minister leh a kaihhnawih mi pawimawhte pek tel an rél bawk.

Kolasib MJA chuan, Kolasib District Hospital thar sak mek, Fast-Track Court & Judge building, Bilkhawthlira Eklavya School leh Tlawng lui kama leimin tur vênna, Bairabi-a siamte chu a nih dan tur ang taka thawh leh siam a nih theih nan a hmunah tlawh an tum bawk a ni.