Hripui vei enkawl lai mi 48 an awm

November 7, Thawhṭanni khan Mizoramah Covid-19 vei mi pariat hmuh chhuah a ni a, hripui vei dam tawh nimin khan mi 14 chhuahtir an ni. Nimin tlai khan hripui vei enkawl lai mi 48 an awm.

IDSP aṭanga thu dawn danin, Thawhṭannia Covid-19 positive hmuh chhuahte chu Aizawl district-a mi paruk leh Mamit district-a mi pahnih an ni a, swab sample 202 endik niin, positivity rate chu 3.96% a ni.

Mizoramah swab sample 19,89,526 endik tawh niin, Covid-19 vei 2,38,879 hmuh chhuah a ni tawh a, a pumpuia positivity rate 12.01% a ni. Nimin tlai dar 3 thlengin mi 2,38,105 (99.68%) chhuahtir an ni tawh a, mi 726 (0.30%) thi tawhin, enkawl mek mi 48 (0.02%) an awm.

Nimin tlai dinhmun angin, Mizorama district 11 zinga district pali - Siaha, Kolasib, Khawzawl leh Hnahthial district-ahte Covid-19 vei an awm tawh rih lo.