PRISM-in bial 23-29 lak theih an inring

PRISM hruaitute chuan Inrinni khan an pisaah thuthar thehdarhtute an kâwm a; kum 2018 Assembly inthlan awm tur atan an inpeih tawh thu leh bial 23-29 la thei tura an inngaih thu a sawi.

PRISM president Vanlalruata chuan, kum 2006 aṭangin PRISM chu pressure group anga an din thu sawiin, "A buaithlak lai chu, a hrem theitu kan ni lo a, mi dik lote hrem tura sorkar nawrtu mai kan ni. Kan duhte sorkarin a tihhlawhtlin ṭhin loh avangin pawl tihtawp mai duhnate kan nei rum rum ṭhin," a ti.

March 22, 2017-a an pawl inkhawmpui thurel angin political activity an neih ṭan thu sawiin Vanlalruata chuan, "Pressure group kan nih laia kan duh sor­kar­in a tihhlawhtlin duh loh laiin, political pressure kan pek chuan an ûm zui char char," a ti a; pressure group ang aiin political pressure pek chu sorkar nawrna atan a ṭha zawk niin a sawi.

PRISM President chuan, November 3, 2017-ah Special Assembly neiin, ram tana rawng­bawlnaah ngaiin political party-ah an inpuan thu a sawi a, "Kan tum ber chu ram siamṭhat leh tun aia sanga chawi san a ni. MLA inthlan hun atan kan inpeih tawh a, candidate 40 kan nei dawn a, kan zinga lang chiah lo candidate kan nei fur dawn," a ti.

Vanlalruata chuan, Chief Minister bial telin, kum 2018 inthlanah bial 23-29 la thei turah an inngaih thu sawiin, "Hei aia tam la thei tur hian hmalak chhunzawm zel kan tum," a ti a; rulling Congress party chu hneh thei ngei turah an inngaih thu a sawi.