KHAWTHLIR

Catholic hmeichhe General Meeting
Roman Catholic Kohhrana Diocese Catholic Hmeichhe Pawl chuan Inrinni leh nimin khan Ramhlun North-a St. Thomas Church-ah General Body Meeting an nei a, Aizawl bishop Most Rev. Stephen Rotluanga'n a hmanpui. Nimin khan Diocese huapin Eucharistic Procession neih a ni a, Treasury Square aṭanga Christ The King Cathedral, Kulikawn thleng kawng an zawh a ni.

MZUAA an lawm
Mizoram University Alumni Association chuan thuchhuah siamin, Mizoram University vice chancellor atana Prof. KRS Sambasiva Rao ruat a ni ta chu lawmawm an tih thu an tarlang a; Vice Chancellor tharin a hna a zawm thuai an beisei thu leh MZU hmasawnna tura ṭha taka a thawh an beisei thu an sawi.

Social workers meet
Baptist Church of Mizoram (BCM) Social Concern department chuan November 10, 2017 khan Sap Upa leh Pu Buanga Hall, Serkawnah Social Workers Meet an buatsaih a, Lungleia rehabilitation centre leh home hrang hrang aṭangin aiawh telin, chhawmdawl rawngbawlna hna thawh dan tur dik leh hlâwk zawka rawngbawl dan tur zirho a ni.

Bengdawngte puitu
VLC Vanlalhriatrenga lehkhabu, 'Bengdawngte puitu' (Counselling for the broken wings) chu November 11, Inrinni khan Synod Conference Centre-ah Dr C Lalhrekima'n a tlangzarh. Lehkhabu hi phek 354-a chhah a ni a, Rs. 210 man a ni.

H/S quiz khâr
RMSA Lawngtlai District leh SkyNet-te chuan Lawngtlaia high sikul zirlaite tana quiz intihsiakna, Inter-High School Quiz Competition an buatsaih chu November 10, 2017 zan khan khâr a ni. Intihsiaknaah hian Lawngtlaia H/S paruk aṭangin zirlai pahnih awmna team pakhat ṭheuh an tel a; Ngurnunsangi English School pakhatna an ni a, Don Bosco School pahnihna niin, ML Junior English School pathumna an ni.