Congress sorkarah sorkar ninna a ziaawm - Lal Thanhawla

Chief minister Lal Than­hawla, Congress party ni bawk chuan, sorkar reng reng term hnih an sorkar tawh chuan mipuiin sorkar ninna an nei ṭhin tih a sawi rualin, Congress sorkarah erawh chuan sorkar ninna a ziaawm hle niin a sawi.

November 11, Inrinnia Din­thar Veng YMA Hall-ah vantlang inkhawmah thu sawiin Lal Thanhawla chuan, "Sorkar reng reng term hnih an sorkar tawh chuan sorkar ninna a awm ṭhin a, MNF sokarah pawh kut hna­thawktute'n chemtum nen kawng an zawh. Kan sorkarah erawh chuan chutiang chu a ziaawm hle a, term hnihna kan hmang chung pawhin mi thar duhawm tak tak an lo la lut zel a ni," a ti.

Lal Thanhawla chuan, politics chu hmelmate an tlukchhiatna leh mahni dinchhuahna tur a ni lo tih sawiin, "Rorelna ṭha leh dik hi politics chu a ni. Ngam loh chala chil hnawmtute vangin ram a buai a, MNF leh Mizo Union pa, mi zawng zawng kan tuar dan a inang vek a, chuvangin politics hian mi tin min hrût rual a ni. Vai sipaite'n biak-in an suasam lai leh curfew vanga biak-in dár a rîk khât raih lai chuan kohhrante thlarau lamah an hnáwng lo," a ti a; rilru fím tak púin politics-ah luh tur a nih thu a sawi.

MPCC President chuan, ram­buai lai, nun hreawm taka Mizoram mipui an awm laia an mamawh chu remna a ni tih sawiin, "Kan sorkar a nih chuan remna lalṭhutthleng kan kian ang kan ti a, khatih lai khan tuma'n min awihsak lo, ni mah se la, Pa hun tiam a thlen chuan kan hotute'n an lalṭhutthleng nam thluin, he ramah hian remna leh muanna tluanting a lo awm ta a ni," a ti.

NLUP chungchang sawiin Lal Thanhawla chuan, "Rambuai vangin kum 20 chhung develop­ment a awm lo a, sâwi khâwm vanga mahni in leh lo kalsante rahbi tuksak nan NLUP kan tiam a, tuma'n min awihsak lo. NLUP hian mi hausa leh sumdawng liante a zawng lo a, Lal Isua'n heng mi tê ber a tihte hi a zawng zawk a ni," a ti a; NLUP chu Pathian lamṭang programme a nih thu a sawi.

Dinthar Venga Congress party inkhawmah hian MLA pathum - Lalrobiaka, R Vanlalvena leh T Sang­kunga te leh, Congress ṭhalai president Dr Lalmalsawma te pawhin thu an sawi a; MNF leh political party dang aṭangin mi 182 an lawm lut niin MPCC thuchhuah chuan a tarlang.