VLDP atan baseline survey neih rel

NEDP hnuaia Village Level Development Programme Steering Com­mittee chu a vawi khat nan November 10, 2017 khan Planning depart­ment conference hall-ah Planning secretary Dr C Vanlalramsanga, VLDP Steering Committee chairman ni bawk hoin an ṭhukhawm a; baseline survey neih an rel.

VLDP Steering Committee chuan, "VLDP hnuaia hmalakna turin baseline survey neih ni se," an ti a; Aizawl, Cham­phai leh Mamit district-ah tlangdung thlan bik atan chak taka hmasawnna an neih theihna tur thlang a, master plan siamsak an rel bakah, District Level Steering Committee din dan tur an ruahman.

VLDP hi UNDP nena ṭangkawpa hmalak tur a ni a, November 10-a meeting-ah hian UNDP aiawhin hmalakna tur hrang hrangte thlirho nghal a ni.

Meeting-ah hian Champhai DC Vanlalngaihsaka, Mamit DC Lalbiaksangi, Aizawl DC aiawh, Cooperative Societies registrar Dr Naveen Agarwall, Economics & Statistics director Lal­chhuanawma leh a kaihhnawih depart­ment hrang hrang hotute an tel.