Serchhipah MNYF Vangpui Fehchhuah
MNF ṭhalai (MNYF) headquarters chuan 'Vangpui Fehchhuah' beihpui an thlakna kal mek zelah November 11, Inrinni khan Serchhip bazarah vantlang inkhawm an buatsaih a; MNYF president Lalrinawma, MLA leh Dr K Beichhua, MLA-te'n thu an sawi.
MNYF president Lalrinawma chuan, Mizoram sorkarin world class education neih tuma hma an lak laiin, sorkar sikulah zirlai an tlem tial tial tih a sawi a, "Hei hian ruahmanna a ṭhat tâwk lohzia a tilang a, amalgamation (sikul sâwi khâwm) kan sawi kan sawi ta mai a. Transfer & posting rules mumal kan neih loh vangin kan buai mek a, hmun ṭhenkhatah chuan zirlai aiin zirtirtu an tam zawk a ni. MNF kan sorkar chuan zirna ṭha zawk kan neih theih nan transfer & posting rules mumal tak nei turin hma kan la dawn," a ti.
Dr K. Beichhua, MLA chuan, "Kan CM Lal Thanhawla'n Kolkata Salt Lake-ah vahrit lianpui a âwk a, chutih laiin, ram mipuite chu chêpa min pe thung," a ti a; Mizoram a dam lo a, sorkarin zu a zawrh aṭangin damdawi ruihhlo man Rs. 500 ni ṭhin chu Rs. 150-te a nih tawh thu leh Mizoram chu India rama HIV/AIDS vei tamna ber a ni hial thu sawiin, "MNF-in sorkarna a siam chuan health care scheme ṭha leh changtlung zawk siam a ni ang," a ti.