Zo Agri Business Solutions hawng

NEDP-Entrepreneurship Develop­ment Scheme (EDS) hnuaia mahni kutkea ding tura intihsiakna, Micro Start-up Competition-a a ti ṭhate zinga mi, Zo Agri Business Solutions, Eden­thar Venga mi chu November 11, Inrinni khan minister Lal Thanzara'n a hawng.

Lal Thanzara chuan, mahni kutkea ding tura hma latute leh ṭan late chu sorkarin a ngaih pawimawh thu sawiin, "Mahni kutkawiha ngaihtuahna sênga hma la a, engkima sorkar beisei loh kan zir a ngai a ni," a ti a; Mizote chu Pathian­in ram nuam, sik leh sa ṭha, ruah­tui ṭha leh thlai chi tinrengin ngeih ram a pek thu sawiin, Mizoram ṭhatna hmang ṭangkaia mahni intodelh turin taimak leh remhriat a pawimawh thu a sawi.

Planning secretary Dr C Vanlal­ramsanga chuan NEDP hnuaia hma­lak­nate a sawi a, "NEDP-EDS hnuaia entrepreneur thlan chhuahte chu an hma­­laknate enpui zui zel an ni dawn," a ti.

Zo-Agri Business Solutions (Mizo­ram Sacha Inchi) hi NEDP-EDS hnuaia MEDMOC-in Micro Start-up Competition a siama ti ṭha 15 zingah a tel a; an inbunnaah hian herbal thingpui fê Sacha Inchi siamna khawl bunin hma an la mek a ni.