Kawng siamtute hna a chhe hleah an ngai

MZP headquarters, Biate chuan thuchhuah siamin, kum 2014 aṭanga Biate ram chhung, Hningtuikawn - Tuipui kawng siamtu Sat Guru company hnathawh chu a chhe hle niin an tarlang a; "Khawtlang mipuite min thamloh mai bakah, Mizote min zahloah kan ngai," an ti.

Biate MZP chuan, Hningtuikawn-Tuipui kawng chu Sat Guru-te'n an siam laiin khawtlangin an theih tâwkin an puibâwm ṭhin tih an sawi a; chutih rualin, hna an thawh zawh mumal hma, fûr khat a liam chauh tihah kawng chu thawmṭhat ngai tam tak a awm leh tawh tih sawiin, company-in a thawm ṭhat hna an thawh danin khawtlang hruaitute duhthu a sâm lo a, V/C, YMA leh MZP Joint Committee-in an balu hman pawh a chhiat lutuk avangin an cancel tir thu an tarlang a ni.

Sat Guru lamin kawng thawm ṭhat hna thawh chu engineer tel loa tih an tum avangin SDO hoin khawtlang hruaitute nen siam dan turah agreement an siam tih sawiin Biate MZP chuan, "Joint Committee hmuhpui loh kar hlekah a siam dan tur ang ni loin hna an thawk leh ṭhin. An hna thawk zo lo leh Biate khuaa an leiba tam tak tlansanin, zanah a rûkin an inthiar chhuak a, an lo tlanbo vek a, khawtlang mipui kan thinrim tak zet a ni," an ti.

Biate MZP chuan, Sat Guru company khawsak dan chu an en liam mai dawn lo tih sawiin, "Mizoram hmun hrang hranga an hnathawhna leh an inkulhnate kan hria a, November 15, 2017 ral hmaa an hna an rawn chhunzawm loh chuan hmun hrang hranga an hnathawhna bungruain a tuar ta a nih pawhin sawi buai theih an nei lo ang," an ti a; Sat Guru company chungah action la tura Mizoram sorkar an phût thu an sawi bawk.