YLA-te tan dan zirna buatsaih

Lawngtlai District Legal Services Authority (DLSA) leh Central YLA Kumpuan Committee chuan Inrinni khan CYLA Hall-ah Lawngtlai khawpuia YLA branch-te tan dan zirna leh CYLA Kumpuan hmalakna thlirhona an buatsaih.

Inkhawm hi CYLA Kumpuan Committee vice chairman F Chan­liana’n a kaihruai a; CYLA president J Sang­thangpuia chuan, YLA kumpuan 'Ram leh hnam humhalh' kawnga hmalaknaah dan bawhchhiatna a la thleng lo chu lawmawm a tih thu sawiin, YLA branch-te chu dan kalha chêt loh hram tum zel turin a chah a, "Kumpuan hmalaknaah a bul ṭan ṭhat a pawimawh rualin, a tawp khâr ṭhat pawh a pawimawh," a ti.

Seminar-ah hian LDLSA aṭangin Legal Aid counsel ST Ram­hma­chhuanmawia'n 'Tlawm­ngai pawlte leh India ram dan' tih thupui a sawi a, Lawngtlai District Child Protection Unit (DCPU) aṭangin legal-cum-pro­ba­tion officer Tommy Hming­dailova'n mihringa sumdawnna, JJ Act leh POC­SO Act chungchang a sawi.

Dan zirhonaah hian Lawngtlai khawpuia YLA branch 12 aṭangin member pali ṭheuh an tel a ni.