Manipur-a hospital ṭhenkhat la khar chhunzawm

Manipur-a hospital leh health centre ṭhenkhat chu thawktu zinga hri kai an awm avangin khar chhunzawm an la ni. Imphal-a  Regional Institute of Medical Sciences (RIMS)-a doctor leh paramedical staff ṭhenkhat chu hri an kai avangin khar a ni a, vawiin thleng khar chhunzawm a la ni ang. Thawktu zinga hri kai hmuh an nih aṭangin ward zawng zawng bakah OPD thlengin khar nghal a ni. 

Private hospital, Raj Medicity pawh emergency service tih loh chu khar chhunzawm a la ni a, Shija hospital-a damlo enkawl lai zinga pakhatin hri a kai tih hriat chhuah a nih avangin ward ṭhenkhat khar a ni bawk. Manipur-ah hian Thawhṭanni khan hri kai hmuh chhuah thar 51 an awm leh a, an state-a hri kai hmuh tawh hi mi 2,286 an tling tawh a ni. Hri kai zinga 1,559 chu enkawl dam ni tawhin, kai mek 727 an la awm a ni.