Bangladesh mi India rama dan loa awm Chungchanga hmalak dan tur siam a ni

Ministry of Home Affairs (Foreigner Division) chuan, November 23, 2009 khan state leh union territory sorkar zawng zawnga Chief Secretary-te leh Border Security Force (BSF) Director General hnenah lehkha a thawn a; Bangladesh aṭanga dân kalha India rama lutte zawn chhuah kawnga hma latu tur Special Task Force din turin a ti. MHA thu hi an bawhzui ṭha vak loa sawi a ni.

MHA Foreign Division thu angin Mizoram sorkar pawhin Special Task Force a din tawh a, mahse, hmalakna erawh a tam vak lo niin an sawi. MHA lehkhaah chuan, March 25, 1971 hnua dân loa India rama lut, Bangladesh mite chu dan loa India rama pêm anga ngaih tur an ni, tih a ni a; state leh UT zawng zawngte tih tur leh BSF-te tih tur eng emaw zat a chuang.

Vanglaini-in RTI Act hmanga a zawhna Home department-in a chhan danin, MHA Foreigner Division-a deputy secretary PV Sivaraman chuan November 23, 2009-ah lehkha a thawn chhuak a; MHA-in kaihhruaina leh tih dan tur a sawi angin, Bangladesh mi, India rama dan loa awm eng emaw zat chu thawn let an ni.

State leh UT sorkara zawng zawngte chu dan loa an state/UT-a Bangladesh mi lut turte man tur leh zawng chhuak turin district tinah Special Task Force din tura tih an ni a; tih tur eng emaw zat tukin, state leh UT sorkar tih tur tlangpuite chu a hnuaia mite hi a ni.

1. Bangladesh mi dan loa India rama pêm man chhuah a nih hnua Foreigners Act 1946 Section 14A(b) hmanga hmalak tur a ni a, Bangladesh mi an ni ngei tih finfiah hnuah thawn let tur a ni. Bangladesh mi an nih leh nih loh a chian hma chu man an nihna state/UT-ah kawl tur a ni.
2. Bangladesh mi, dan loa khawi emaw state/UT-a awm hriat chhuah a nih chuan chu state/UT chuan a chhui zui tur a ni. Man a nihna ni lo state/UT dang mi leh saa a inchhál a nih chuan a mantu state/UT sorkarin a awmna a sawi state/UT-a Home Secretary leh DC/District Magistrate hnena a nihna kimchang a sawite a thawn ang. A awmna nia a sawi state/UT leh DC/District Magistrate-te chuan ni 30 chhungin report an thawn let tur a ni.
3. State/UT sorkarte chuan Bangladesh mi nia rinhlelh leh man la thawn let lohte awmna tur hmun a ṭul angina a siam ang.
4. Bangladesh mi nia rinhlelh leh man, mahse, India mi nia inchhálte chungchang chhui fiah a nih hnuah, chu'ng mite chu an awmna tura hmun siam hrang hrang West Bengal-ah dah turin state/UT police-te'n BSF kutah an hlan ang. Bangladesh mi BSF kuta hlan tura kalpuite vengtu police-te chu Foreigners Act 1946 Section 3(2)(c) hmanga thuneihna pek an ni ang.
5. State/UT sorkar zawng zawngin BSF kuta Bangladesh mi thawn let tura an hlante chu felfai takin an chhinchhiah vek tur a ni a, chu chu MHA-ah thla tin an report tur a ni. Report hi tihmakmawh a ni a, thla tin ni 15 hmain Foreigners Division, MHA-ah thawn tura ni.
6. Bangladesh mi thawn let turte phurhna senso chu state/UT sorkarin an tum phawt ang a, a hnuah a kaihhnawih sensote nen MHA-ah an dil leh thei ang. Thawn let turte dah lailâwkna hmun din leh enkawlna sensote chu state/UT-in an tum tur a ni thung.

BSF tih tur tlangpuite
1. Bangladesh mi, India rama dan loa lut/awmte chu man nih chuan ramria duty BSF-te'n an thawn let nghal tur a ni.
2. Thawn let leh nghal mai theih loh an awm chuan BSF-in an kawl ang a, thu an zawtfiah tur a ni. Thil tih sual nei an nih loh chuan Bangladesh Rifle (BDR) nen sawihoin (flag meeting), BDR hnenah an hlan tur a ni a; BDR hnena an hlante chu BSF-in an chhinchhiah thlap ang a, chu chu MHA-ah an thawn zel tur a ni.
3. Bangladesh nena inri state/UT-ah Bangladesh mi rinhlelha man, an chungchang chhui zuite chu chhui zawh an nih hunah an state/UT-a Bangladesh mite thawn let chungchang buaipui tura ruat BSF officer kutah hlan tur a ni.
4. BSF hian an kuta dan loa pêm lute hlan an nih dan chu state/UT police hnenah an hrilh zel ang a, chutiang bawkin state/UT sorkarah pawh an hrilh ang.
5. BSF pawhin an kuta Bangladesh mi thawn let tura police-in an hlante chu an chhinchhiah ang a, MHA-ah thla tin report an thawn ziah ang. Report hi tihmakmawh thil a ni a, thla tin ni 15 hmain Foreigners Division, MHA-ah thawn tur a ni.