Sum enkawl dan zirna buatsaih

National Academy of RUDSETI, Bengaluru leh Mizoram State Rural Livelihood Mission (MzSRLM) ṭangkawp chuan, nimin khan SIRDPR conference hall, Leitanah Training of Master Trainers on Financial Literacy an buatsaih a, SIRDPR director Maria CT Zuali'n a hawng.

Maria CT Zuali chuan, training pawimawh Mizorama SIRDPR hmunah neih a nih chu lawmawm a tih thu a sawi a, "Sum enkawl leh peipun lamah hmasawnna tur kan la ngah hle a, bank-te pawhin tih tur pawimawh leh mawhphurhna sang tak an nei a, an inhawn a ngai hle a ni," a ti.

SIIRDPR Director chuan, thingtlanga self help group-te'n sum leh pai peipunna kawng­ah hma an sawn ngei theih nan training nei tura kalkhawmte chu an pawimawh tih a sawi a; training-a telte chu thing­tlanga mi harsa leh rethei zawkte'n an chhawr ṭang­kai a, an thawh chhuah a pun theih nana zirtirtu tur an nih avangin taima tak leh ṭhahnemngai taka training nei turin a chah.

Training-ah hian district hrang hranga MzSRLM hnuaia thawk te, State Bank of India leh Mizoram Apex Bank aṭangin mi 30 an tel a ni.