Mizorama vote nei zingah mipa aiin hmeichhia 23,418-in an tam zawk

Election Commission of India (ECI) thuchhuak angin Mizoram pumah electoral roll ennawnna, Special Summary Revision of Photo Electoral Rolls, 2023 neih a nih dawn avangin nimin khan Draft Electoral Roll tlangzarh a ni a; draft roll-ah hian mipa aiin hmeichhe vote nei 23,418-in an tam zawk.

Mizoram Draft Electoral Roll-a a lan danin Mizoramah voter 8,31,272 an awm a, voter zinga 4,03,927 chu mipa niin, 4,27,345 chu hmeichhia an ni a, mipa aia hmeichhe vote nei tam zawkna chu 23,418 a ni.

Mizorama district 11 zingah mipa aia hmeichhe vote nei tam zawkna district pakua a awm a, Mamit leh Khawzawlah chuan mipa voter an tam zawk thung. Vote tamna ber district Aizawlah chuan voter 2,76,657 an awm a, a tlemna ber Hnahthial district-ah voter 15,694 an awm.

Special Summary Revision of Photo Electoral Rolls, 2023 atan hian kumin November 9 aṭanga December 8 chhungin hming thehluh, paih leh siamṭhatna hun hawn a ni dawn a; final electoral roll chu January 15, 2023-ah tlang­zarh a ni ang.