PUM Mizoram Innovation Fair ṭan a ni

Deputy chief minister Tawnluia chuan nimin khan Industrial Training Institute (ITI)-ah ‘PUM’ Mizoram Innovation Fair 2022 a hawng a; November 11, 2022 thleng neih a ni ang.

PUM Mizoram Inno­vation Fair hi November 11, 2022 thleng neih tur a ni a, ITI-a zir mek te, chhuak tawhte leh kut themthiamna lama tui leh thiamthil neite tana buatsaih a ni. Thil siam chhuahte pho chhuah a ni a, inelna a nih bakah, an thil siamte mipui tana lei theiha zawrhna hun a ni a, mi 64 an tel. Skill and Entrepreneurship Award sem a ni dawn bawk.

Deputy Chief Minister chuan, ṭhalaite thiamthil tihpuna eizawnna tlinga siam a pawimawh tih sawiin, "Hma latu LESDE department pawh sorkarin a tuaihnûm chho zel," a ti a; miin thiamthil hmanga ei a zawn theihna tur kawng zawnpui a ṭul thu a sawi.

Tawnluia chuan, skill training chu SEDP hlawhtlinna tur hmanraw pawimawh a nih thu sawiin, "Degree sang tak nei kher loa eizawnna hlâwk tak neih theihna a nih avangin a ṭangkaiin a pawimawh tawlh tawlh a, sorkar hmalakna SEDP hnuaiah kut hnathawktute khai chhuahna leh intodelhna tur ruahman a ni," a ti.

Labour, Employment, Skill Development and Entre­pre­neurship (LESDE) minister Lalchhandama Ralte pawhin thu sawiin, Mizoramah ITI pathum - Aizawl, Lunglei leh Champhaiah a awm mek thu a sawi a; Champhai, Serchhip, Kolasib leh Mamit-ahte ITI din tum mek a nih thu leh Mamitah chuan in sak zawh tawh a ni a, session tharah ṭan hman tum a nih thu a sawi bawk.