Mobile phone aṭanga chawhmeh leh thil dang zawrhna Famcart mobile application tlangzarh

Mizorama thlai thar, Mizote'n thil hrang hrang hmanga chaw­hmeh an siam leh choka mamawh hrang hrang zuartu Famcart-in mobile application an buatsaih, Famcart tih chu nimin khan Horticulture additional director CH Lalmuanpuia'n HYVE Aizawl City Hall-ah a tlangzarh.

Famcart application hi Google Playstore aṭangin download theih a ni a, application-ah hian an thil zawrh hrang hrang leh a mante tarlan niin, application hmangin chah theih a ni.

CH Lalmuanpuia chuan, thlai leh thei thar lamah kut hnathawktute'n hmasawn mah se, a hralhna lamah harsatna a awm ṭhin thu a sawi a, "Hetiang anga Famcart-in hma an la hi a lawmawm tak zet a ni," a ti.

Famcart hotupa Lalnunpuia chuan, zâwi tê têin hma an lak thu sawiin, "Technology base-a kal kan ni a, data la khawmin, chumi hmang chuan hma kan la ṭhin," a ti a; an tum ber chu kut hnathawktute thar chhuah hralhsak a nih thu a sawi. Famcart aṭangin Zodingpuii'n an hmachhawp leh har­satnate a sawi bawk.

Application tlangzarh zawhah 'Vegetable Supply Chain in Mizoram' tih thupui sawihona hun hman a ni.